Dearest Yucky：

 

首先，重溫一下老字號“新海”牌速食涼粉包裝盒上嘅文字先：
配料：澱粉、粘米粉、涼粉草。
用法：本品每盒可配水２３００毫升，即一般飯碗九碗   
        水，先取貳碗冷水把涼粉開成無核的糊狀，再用   
        餘下之水煮滾，把糊邊沖邊攪勻至沸，待充分冷  
        凝後即可食，冷藏後味更佳，風味獨特，淡、鹹、
        甜食隨意。
淨含量：１００克  

 

大家都知道，呢段唔清唔楚嘅文字用嚟教一個唔入廚房嘅人整涼粉的確係難為咗啲。經過請教專人臨房實踐，我哋通過Ｑ＆Ａ嘅方式，再次深入地記錄底整個過程。

 

Ｑ：用一個2.5L裝嘅大炮樽大概量2300毫升准？定真係用9個飯碗（我都唔知1個飯碗可以裝幾多水）量得准？
Ａ：屋企細細個、有條柄、用嚟煮面煮餃子嗰個煲剛剛好夠，倒水倒剩2公分唔到面就得了（冇乜把握的話，都係量7碗水啦），然後用2碗水倒落一個大兜度，個份量就OK喇。

 

Ｑ：“貳碗冷水”何為“冷水”？指“涼白開”、“凍滾水”定“水喉水”都得呢？點先算“無核的糊狀”？乜涼粉粉有核嘅咩？
Ａ：“冷水”=“涼白開”、“凍滾水”；“無核的糊狀”即好似開牛奶噉唔結塊囉。

 

Ｑ：搞到幾時先可以煮？
Ａ：搞到差唔多可以煮就可以擰去煮了。反正搞到“無核的糊狀” 噉樣啦。

 

Ｑ：點理解“再用餘下之水煮滾”，係唔係加咗落去煮定點啊？
Ａ：即系將嗰煲水（7碗水）煮熟~唔系~煲滾咗~（順使講埋用非BB壺、電熱水壺點樣判斷啲水叫做“滾”，其征狀有二：1標煙、2起泡。）啲水滾喇，就擰到去一點火，然後一路加入“無核的糊狀”一路攪暈。“把糊邊沖邊攪勻至沸”呢句睇唔明唔緊要，總之一路攪一路攪，唔好畀佢粘底同結塊，直到再次滾（標煙、起泡）就可以熄火了。

 

Ｑ：熄火後做乜？
Ａ：儘快倒落其他盛具，如：兜、碗、盆、碟等，放埋一邊等佢自然凍，然後放入雪櫃，就好似jelly噉結咗就食得了。

 

整涼粉雖然冇整羅百臣啫喱仔咁易，但都唔係好難。
相信自己，熟能生巧。
加油啊！Yucky！

                                             From：學識整速食涼粉無耐嘅Yucky
                                                        Jun 17, 2009

To: Myself
   
    今日係世界“321”睡眠日，又近春分，溫度同濕度都極之適合瞓覺……
   
    ……
   
    當然，呢篇嘢唔會就噉結束，你估真係去咗瞓覺咩？今日雖然係Weekend，不過都係要返工嘅。今朝又遲到了，今個月好似都冇乜邊幾日係冇遲到過，真係好想舒舒服服噉瞓一覺。其實都唔係睡眠時間唔够，問題係好多夢，而且次次個感觀都好真實，真到好似冇瞓過噉，一覺瞓醒到天光都好似遊歷咗幾個鐘，暈喇……
   
    講開夢，諗起一啲講解夢嘅書。以前試過上網都查過關于解夢嘅事，但係好似牽涉嘅嘢太多，跟本都解唔通，而且好多時夢醒之後只會記得好小一部份嘅情節，經歷咗咁多嘢都“前功盡廢”。唔知其他人會唔會都係醒咗之後，如果有有刻意去講返個夢出嚟，隔咗好耐都會重記得啲情節；如果即日內未穩到人分享，即使當晚想講畀人知都已經失咗效，諗極都極唔起個故事內容，只會記得“我尋晚發咗個夢”而已。
   
    重記得細細個發夢自己發緊夢，去醫院唔知探咩人，醫院突然停電，日光日白都唔知點解會黑濛濛，醒咗之後成間屋得返自己一個人，而且重係瞓响張食飯檯度，成屋着晒燈，特別係天花板上面果盞大花燈全部泛白光，好光好光，周圍一個人都冇，間屋白到出奇，無啦啦就噉嚇醒咗，之後就一直都好驚啲好白好光嘅環境。呢啲算唔算就叫做童年陰影呢？小學嗰陣發過一個夢，放暑假响屋企關埋晒門窗然後開水喉，成間屋變咗一個大泳池，暢泳過後醒來一身汗，十分不爽，之後一個星期夜夜失眠，自己都唔知點解。嫲嫲話佢細細個經常會發夢見到自己識飛，我就經常會發夢自己揸車，响我廿幾年嘅“車齡”入面未試過出意外，縱使往往有驚無險，醒咗都唔會一身虛汗，有時重會發現醒咗都未天光，繼續瞓，繼續發夢。
   
    無論如果，一直以嚟我都迷信夢係有意思嘅，有時有啲夢又的而且確會變真。响個夢度去咗一啲從來都未見過嘅地方，過後幾日又真係會去一個同夢鏡一模一樣嘅地方；又或者某一啲朋友（我身邊嘅朋友經常會响我啲夢入面客串下）同我講嘅一啲說話，响夢入面冇前因後果，但又會無端端畀我記住，而往後幾日又有可能會因為一啲事情而真係出現返果啲對話。就講近幾個月，有過唔止一個夢出現狗狗，而現實又真係有唔止一隻狗出現响我嘅生活中。
   
    睇嚟，一個不值一提嘅夢，生命力唔超過12小時，而一啲謎一樣嘅夢，過咗好多年都冇辦法明白當中嘅意義。“夢想成真”似乎係一個褒義詞，不過有時我反而唔係咁想，畢竟我發親啲夢都係惡夢居多，可以講具有豐富嘅嚇醒經驗。
   
    希望今晚唔會發夢，好好噉畀我瞓到聽日中午啦。^oo^
   
From: 帶住黑眼圈工作嘅Yucky